Многу често се случува родителите да ги именуваат новородените деца по нивните идоли, било да се тоа познати личности или ликови од популарни филмови и серии. Многумина се водат и од верувањето дека нивните наследници, благодарение на нивното име, ќе ги добијат карактеристиките и славата на нивните познати имењаци.
Имено, во Славонски Брод, Хрватска, живеат две деветгодишни момчиња по име Кристијано Роналдо и Лео Меси Стојановиќ. Како што пренесува РТЛ Данас, тие ги добиле своите имиња бидејќи нивните татковци се страсни навивачи на Барселона и Реал Мадрид.
„Јас и брат ми навиваме за тие клубови. Кога жена ми остана бремена, веднаш решив да го именувам син ми Лео Меси, брат ми, исто така, реши син му да биде Кристијано Роналдо“, вели таткото на Лео Меси, Жељко Стојановиќ.
Меси е срамежлив, Роналдо не, Лео има подобар шут, а Кристијано е подобар техничар. Кога ќе пораснат, би сакале да бидат фудбалери и да ја стекнат славата на нивните имењаци.
„Лео Меси е добар со мене како пријател, но и како играч“, вели Кристијано Роналдо за својот брат.
Кога се читаат нивните имиња на турнирите, сите се во неверување. Така е и на училиште.
„И учителката беше малку изненадена од каде ни дојде идејата да дадеме такво име. Само рековме дека така решивме и тоа беше тоа. Додека беше Ел Класико и додека Меси беше во Барселона, а Роналдо во Реал Мадрид сите ќе се соберевме, јас навивам за Барселона, брат ми за Реал Мадрид и гледаме заедно. Ќе има расправии, но повеќе навивање“, додава Жељко.
Бидејќи и двете момчиња тренираат фудбал и имаат големи соништа, може да се случи еден ден Кристијано Роналдо и Лео Меси всушност да играат за хрватската репрезентација.