За патување на грчките острови, од понеделник ќе биде задолжително поседување сертификат за вакцинација, потврда за прележан Ковид-19 или негативен ПЦР или рапид тест.

Одлуката, базирана на препораката на Комисијата на епидемиолози, ја соопшти заменик- министерот за цивилна заштита на Грција Никос Хардаљас, кој објасни дека од 5 јули, за оние кои имаат сертификат за вакцинација или потврда за прележан Ковид-19 нема да има рестрикции, додека пак за останатите задолжителен е негативен ПЦР тест направен 72 часа пред патувањето или рапид тест 48 часа пред поаѓањето.

Децата до 12-годишна возраст ќе патуваат слободно, а за оние од 12 до 17 години, потребен е било каков тест, вклучително и селф тестот, односно тестот за домашна употреба.

Хардаљас информира дека постои препорака за враќање од островите, сите над 12 годишна возраст да прават селф тестови.

Досега, на островите, можеше да се патува и со направен тест за домашна употреба, откако граѓаните, резултатот го пријавуваа на специјален сајт.

Освен неопходните документи поврзани со Ковид-19, за патување со брод на грчките острови, задолжително е и пополнување на специјален формулар, достапен на https://sea.travel.gov.gr/#/.