Претседателот на Србија, Александар Вучиќ, денес изјави дека брзата железница Нови Сад - Суботица ќе биде пуштена во сообраќај за комерцијална употреба во среда, 8 октомври, и дека за речиси 200 километри, цената на билетот ќе биде околу 8,5 евра, а дека од среда до недела, 12 октомври, ќе биде бесплатна за сите.
За време на патувањето до Суботица од Белград, со брзиот воз „Соко“, а по повод пуштањето во употреба на железницата од Нови Сад до Суботица, тој рече дека е неверојатно што од главниот град на Србија до Суботица ќе бидат потребни 70 до 72 минути возење.
Возот во кој се наоѓал Вучиќ тргнал од станицата „Белград Центар“ во 11:35 часот наутро и пристигнал во Суботица за еден час и осум минути.
Вучиќ им порача на граѓаните кои го пречекаа во Суботица да создадат историја и дека од март ќе стигне до Будимпешта за еден час и 35 минути, а до Белград за еден час и 10 минути.
Обраќајќи им се на граѓаните, тој додаде дека е особено среќен што брзата железница од Нови Сад до Суботица е дел од проектот што Србија го реализираше заедно со Унгарија.
Со изградбата на брза железница од Белград до Суботица, како што рече Вучиќ, Србија изгради коридор кон Централна Европа преку Будимпешта, иако првичните разговори за тоа беа водени со Хрватска.
Враќајќи се со воз од Суботица, во разговор со претставници на медиумите, Вучиќ рече дека Србија мора да гради уште побрзо и посилно во наредниот период.
„Кога разговаравме за сето ова, прво беше со Хрватите, потоа Милановиќ ми рече дека не се заинтересирани за источните излези. Сега гледам дека се заинтересирани, тоа е добра промена. Го изградивме нашиот главен коридор кон Централна Европа преку Будимпешта и донесовме одлука, а сега мора да градиме уште посилно, многу побрзо“, рече Вучиќ.
© Vecer.mk, правата за текстот се на редакцијата
