ОЧЕКУВАМЕ ДА ГО ЗАЗЕМЕ ЗАСЛУЖЕНОТО МЕСТО

Иванов: Република Македонија ги исполнува сите услови и критериуми за членство во НАТО

Република Македонија ги исполнува сите услови и критериуми за членство во НАТО алијансата, а со учеството во мировните мисии де факто се однесува како членка на северно-атлантската организација, и во тој контекст очекуваме натамошна интензивна американска поддршка, со цел Република Македонија да го заземе заслуженото место во НАТО, порачал претседателот на Република Македонија Ѓорге Иванов на средбата со генерал-мајор Стивен Креј, командант на Националната гарда на сојузната држава на Соединетите Американски Држави, Вермонт, кој престојува во посета на Република Македонија.

"Претседателот Иванов го поздрави стратешкото партнерство на Армијата на Република Македонија со Националната гарда на Вермонт изразувајќи уверување дека успешната соработка со оваа сојузна држава во делот на одбраната претставува можност за проширување на соработката и во други области од заемен интерес", се вели во соопштението од Кабинетот на Иванов. 

На средбата биле разменети мислења за долгогодишната плодна соработка меѓу Армијата на Република Македонија и Националната гарда на Вермонт преку заедничкото учество во мировни мисии, реализацијата на заеднички вежби, обука и едукација на припадниците на двете армии.

"Генерал-мајор Креј оддаде признание за севкупниот ангажман на македонските војници во меѓународните мировни мисии, и додаде дека САД како и досега ќе продолжи да биде поддржувач на стратешката определба на Република Македонија за целосна интеграција во евроатлантските структури", соопштија од Кабинетот. 

Во 2012 година претседателот Иванов ја одликуваше Националната гарда на Вермонт со Орден за воени заслуги.

Поврзани

Најнови вести

Коментари