НА СКОПСКА ЦРНА ГОРА ИМА РАЈСКА ГРАДИНА, НЕДОСТИГА САМО УШТЕ ЦРКВА

Чичко Никола видел како изгледа пеколот, па се вратил назад во Раштак!

Овој возрасен мештанин со многу интересна животна приказна пред 48 години доживеал клиничка смрт, а потоа сиот свој живот го посветил на селото и на помагање на луѓето. Вели дека на сон му се јавила мајката Божја и побарала во Тополче до чешмата со лековита вода да се изгради црква. Но, тоа може да се реализира само доколку Општина Гази Баба дозволи плацот околу чешмата од околу илјада квадрати да се размени со половина хектар црковно земјиште над патот. Чичко Никола и сите жители на Раштак се надеваат на поддршка од локалната власт.

Лековитите води од изворот Тополче во Раштак им помогнале на многумина. Од секаде доаѓаат луѓе со очобол. Се замиваат еднаш, двапати и им поминува маката. Изворот тече од памтивек, а бројот на оние кои се излекувале не се знае. И не треба да се знае. Тоа ти е божја работа... Вака чичко Никола Иванов ја почнува приказната за чудотворните води во ова село сместено во питомиот дел на Скопска Црна Гора, на само дваесетина километри од Скопје. Тој не однесе до чешмата за да ни покаже дека местото кое во изминативе неколку години е оплеменето благодарение на помошта на неколкумина верници кои се излекувале од изворската вода може да прерасне во црковен комплекс, но само доколку Општината дозволи плацот околу чешмата од околу илјада квадрати да се размени со половина хектар црковно земјиште над патот.

Семејството на универзитетеската професорка Светлана Јакимовска е едно од трите семејства најголеми донатори

- Со години бараме, молиме надлежната Општина Гази Баба да го отстапи земјиштето кое некогаш било приватно. За возврат даваме пола хектар црковно земјиште над патот. Ова парче сакаме да го префрлиме на нас, на црквата "Свети Спас“. Ги молевме сите, молиме уште. Тоа за нас значи многу, собиралиште ни е - раскажува чичко Никола.

Овој возрасен мештанин со многу интересна животна приказна сиот свој живот го посветил на селото и на помагање на луѓето. Ни рече оти се верува дека лековитата моќ на водата и ја даваат тројца светци: свети Спас, света Петка и света Богородица.

- Кога се градеше новиот пат водата секна, се изгуби изворот. Но, не помина долго, по некоја година патот пропадна за осумдесетина сантиметри. Се појави светата вода. Тогаш решија водата да се насочи и направија цевка за да тече, се изгради потпорен ѕид - раскажува чичко Никола, кого многумина го познаваат по исцелителната моќ.

Ја добил откако пред 48 години доживеал клиничка смрт, кога, како што ни рече, со помош на неколку светци стигнал до рајските порти, видел како изгледа и пеколот, па се вратил назад. Но, како што појаснува, со мисија која ја добил како задача. Да му помага на секој кој има мака, каков било проблем.

-Кај мене доаѓаат болни од секакви болести, но и немажени, неженети, брачни двојки кои немаат деца, млади со проблеми со школото, буквално луѓе што чуле за мене и мислат дека можам да им помогнам. Јас не баам, не гатам, јас помагам со помош на светци. Го барам светецот за да можам да ја откријам причината, да видам дали има лек и од каде може да се добие. Се со божја промисла. Никогаш не е погазена ни божјата страна ни медицината - вели нашиот интересен соговорник.

И додава: кај него нема лага, бидејќи тоа е божји грев. Всушност, уредувањето на чешмата во вид на црквичка ја почнал човек на кого претходно му помогнал да се излекува со светата изворска вода.


-Меѓу многумината кои со некоја мака доаѓаа да им помогнам беше Стојче, кој имаше болест на очите, го губеше видот. Му велам, слушај, имаме во селово света вода која ни помага. Го однесов, човекот се зами, дојде уште два пати на седум дена и се излекува. По некое време ете го дојде пак. И ми вели: "Чичко Никола, ти ми помогна еднаш, сега пак барам помош. На сон ми се јавија жена и маж облечени во црно и бараат од мене на оваа вода која со векови сте ја користеле јас да изградам чешма. Кажи ми каде да појдам, да прашам и да ми препорачаш мајстор“ - ни раскажува чичко Никола за почетокот на уредувањето на просторот.

Откако добиле дозвола, одлучиле мајсторлакот да му го препуштат на мештанин кој бил приучен мајстор, но имал голема дарба за градба. И почнале. Чешмата во вид на црквичка ја граделе од стари ќерамиди, но прераснала во вистинско уметничко дело. Претходно целиот насип го израмниле и го заштитиле со потпорни ѕидови.


- Ова е навистина свето место - вели чичко Никола, како да сака да не убеди во секој збор што го кажува. Вели дека откако завршила изградбата на чешмата, тој сонил чуден сон.


- На сон ми вели: Чешмата ја направивте, а знаете ли дека на свети Спас пред 40 години му го земавте ручекот, престанавте да го славите празникот? И оттогаш свети Спас ви зема по неколку жртви годишно. Отсега овде да се собирате и да дадете ручек и ова место нема да се вика "Свети Спас“, туку "Света Богородица“.И еве неколку години наназад на 28 август се собираме и сите заедно ја славиме Света Богородица. Првата година се прашав која е можноста да го направивме летниковец да доведам и селска вода, за да има за потребите на одржување на црквата. Со црковни пари, со донации го изградивме летниковецот за да имаме трем за ручање, а потоа со бабата се договоривме ние да изградиме чешма од селски водовод. Ги дадовме сите пари што ги чувавме за не дај Боже и еве полека ова место се претвори во рајска градина - вели чичко Никола и додава дека недостига само уште црквата.

Тврди дека пари за изградбата ќе се најдат, само доколку им помогне Општината. Има црковен одбор, но најбитно е да се префрли местото на црквата и да се отвори наменска сметка каде што ќе можат да се примаат донациите.

- Така рече света Богородица. Овде да има трем, таму да биде црквата, а таму светата вода. Ова ни е собиралиштето. Кој и да не чуе, да дојде, да види, да помогне - апелира чичко Никола.
Не испрати со надеж дека многу скоро локалната власт позитивно ќе им одговори.

Чичко Никола - божји човек

„Пред 48 години сум доживеал клиничка смрт, па сум вратен во живот и во овие 48 години работам со народ. Доаѓаат од цел свет. Не само од Македонија, од разни држави. На секого ја пружам раката онолку колку што Господ ми дава и сакам да помогнам на секого. Затоа се молам на секого кој ќе чуе, кој ќе разбере нека ја пружи раката нека ја почувствува топлината божја. Овде е мајката Богородица, на сите ни го покажува патот.“

Елизабета АРСОСКА
фото: Ѕ.ПЛАВЕВСКИ

 

 

Поврзани

Најнови вести

Коментари