Бошњаковски: Новиот директор на МРТ ќе биде на функција сè до усвојување на Законот за медиумски услуги

Изборот на новиот директор на МРТ, Марјан Цветковски е на важност сè додека не го усвоиме новиот Закон за аудио и аудиовизуелни медиумски услуги, а тоа се очекува да се случи до крајот на оваа недела, изјави портпаролот на Владата, Миле Бошњаковски.

„Околу изборот на директорот на МРТ, сакаме да појасниме дека Владата нема никаква пврзаност со овој избор. Овој избор е одлука на програмскиот совет на МРТ кој сè уште функционира во стариот состав, а граѓаните добро знаат кој членува во тој стар состав, на кој начин работеше и под чии влијанија и на каков начин е направен овој избор. Веднаш по усвојување на новиот Закон за аудио и аудиовизуелни медиумски услуги ќе се овозможат професионални, непартиски нови раководни позиции и во МРТВ и во Агенцијата за аудио и аудиовизуелни медиумски услуги. Тоа значи дека овој избор е на важност сè додека не го усвоиме Законот“, рече Бошњаковски.

Тој додаде дека со ова законско решение, Владата ќе ја прекине праксата на нетранспарентност и ќе овозможи целосна професионализација и непартизација на МРТ и на Агенцијата како две значајни институции. Бошњаковски рече дека можно е до петок Владата да одржи посебна седница на која, како што рече, се очекува да помине новиот Закон за аудио и аудиовизуелни медиумски услуги.

извор: Makfax

Поврзани

Најнови вести

Коментари