Изненадување

И Николиќ ќе се кандидира за претседател, Вучиќ засега молчи

Лидерот на социјалистите Ивица Дачиќ оцени дека ако веста за кандидатурата на српскиот претседател Томислав Николиќ на претседателските избори во Србија е вистинита, срамота е тој со тоа да и придружи на плејадата кандидати кои се против српскиот премиер Александар Вучиќ

Српскиот претседател Томислав Николиќ ќе се кандидира повторно на претседателските избори, јави „Спутник", а подоцна и Б92 ја потврди информацијата, повикувајќи се на извори во кабинетот на Николиќ.

Српските медиуми јавија дека Николиќ одлуката за кандидатурата ја донел во средата вечерта на прославата на неговиот 65 роденден.

Претходно, Танјуг пренесе дека од кабинетот на Николиќ не сакале официјално „ниту да ја потврдат, нуту да ја демантираат оваа информација".

Кога српските медиуми ја објавија оваа вест, Николиќ на неговиот Твитер профил напиша: Нема потргнување, ниту повлекување.

Покрај објавата на Твитер, тој сподели и фотографија со српскиот премиер Александар Вучиќ од приемот одржан по повод Денот на државноста, како и фотографија од говорот при што го наведува тоа.

Николиќ претходно изјави дека не е изненаден од „исходот на гласањето" на претседателството на Српската народна партија, со што е дадена поддршка на кандидатурата на лидерот на партијата Александар Вучиќ на претседателските избори.

На прашањето од новинарите: дали се откажал од кандидатурата, Николиќ наведе: Ќе се договориме.

Тој исто така, на прашањето: како ги коментира наводите на медиумите дека неговиот син ја поддржал кандидатурата на Вучиќ, нагласи дека Радомир Николиќ „го изнел неговиот став на подготвителниот состанок".

Претседателството на седницата на Српската народна партија во вторникот, едногласно одлучи за претседател на Србија, како нејзин кандидат, да го назначи Александар Вучиќ.

Вучиќ потоа наведе дека без поддршката на претседателот Николиќ ништо не би можеле да направат и дека тоа е негова „историска улога".

- Оној кој би гласал за мене, би гласал и за него. Тој е најдобар можен кандидат, но ова е проценка поради стабилноста и три-четири отсто, кои би можеле да одлучат. Проценката е дека вака полесно можеме против оние кои се обединија за Србија да ја вратат назад, истакна Вучиќ.

- Планирам да работиме заедно и немам никаков проблем со тоа, но треба да видиме како да се поделиме. Многу го сакам Николиќ, многу ги сакам сите, но најмногу ја сакам Србија, нагласи Вучиќ.

Лидерот на Социјалистичката партија на Србија (СПС) Ивица Дачиќ оцени дека ако веста за кандидатурата на српскиот претседател Томислав Николиќ на претседателските избори во Србија е вистинита, срамота е тој со тоа да и придружи на плејадата кандидати кои се против српскиот премиер Александар Вучиќ.

- Повеќепати сум истакнал дека за Србија е најдобро да се зачува политичката стабилност по пат на кандидатура на човек кој ја ужива најголемата поддршка од народот, а тоа несомнено е Вучиќ, изјави Дачиќ за Танјуг.

Лидерот на Социјалистичката партија на Србија истакна дека ако Николиќ навистина се кандидира против Вучиќ, тој лично и цела СПС, како и Драган Марковиќ Палма, уште посилно ќе го поддржат Александар Вучиќ.

- Единствено логично и рационално е кандидат да биде оној кој ќе победи, со или без Николиќ. А што ќе направи Николиќ без Вучиќ, и тоа е јасно - ништо, само ќе им помогне на оние кои се против Вучиќ. И тоа безуспешно, заклучи Дачиќ.

Освен Вучиќ, кандидатури за претседател претходно најавија лидерот на радикалите Воислав Шешељ, поранешниот министер за надворешни работи Вук Јеремиќ, доскорешниот народен правобранител Саша Јанковиќ и лидерот на конзервативното движење Двери Бошко Обрадовиќ.

Поврзани

Најнови вести

Коментари